Hevseroka Giştî ya HDP’ê Perwîn Buldan, di civîna partîya xwe de di derheqa rojevê de peyîvî. Perwîn Buldan daneyên enflasyonê yên TUÎK’ê nirxand û wiha got: “Enflasyon bi tevî lîstikên TUÎK’ê gihîşt ji sedî 65.” Buldan, gotinên Wezîrê Xezîne û Darayîyê Nureddîn Nebatî bi bîr anî û got: “Ew qey heya dawîya meha Berfanbarê bimîne dipeyîve, lê em dixwazin bînin bîra wî; hûn ê biçin, hûn ê nikarin sala 2023’an jî bibînin.” Buldan daxwaz kir ku ji bo ceyrana esnafan herî kêm ji sedî 70 daxistin çê bibe û wiha berdewam kir; “bila şirîketên alîgir na, bila bazirgan qezenç bike. Deynên KYK’ê yên xwendekaran we jêbirin. Mûçeyê kêmtirîn bila sê mehan carekê were nûjen kirin. Îkramîyeya teqawutan bila herî kêm 5 hezar lîre be. Bila OTV bê rakirin. Em van bangên xwe carek din ji hikûmetê re dibêjin.”