Partîyên sîyasî yên ku biryara betalkirina Peymana Stenbolê birin Şûraya Dewletê, di derbarê redkirina serîlêdanê de daxuyanî dan.

Berdevka Meclisa Jinan a Partîya Demokratîk a Gelan (HDP) Ayşe Acar Başaran, biryara Şûraya Dewletê nirxand û wiha got, “Em weke jin vê biryarê nas nakin. Vê biryarê carek din nîşan da ku qanûn çawa bûye amûra desthilatdariyê.” Seroka Şaxa Jinan a CHP’ê Aylîn Nazliaka jî di derbarê mijarê de nirxandinan kir û wiha got; “Destûra Bingehîn careke din hat binpêkirin. Îradeya Qesrê di ser vîna Meclîsê re hat danîn." Nazliaka anî ziman ku ew ê serî li Lijneya Giştî ya Daîreyên Doza Îdarî ya Şûraya Dewletê bidin û wiha berdewamkir; "Eger hiqûqa navxweyî biqede em ê serî li Dadgeha Destûra Bingehîn bidin. Em ê heta dawîyê têkoşîna xwe ya hiqûqî bidin meşandin."