Asim Sûltanoglû ku ji ber tecawiza li Weqfa Ensarê derheqê wî de lêpirsîn hatibû vekirin, weke Midûrê Perwerdeya Neteweyî yê Rihayê hatibû tayînkirin.

Platforma Ked û Demokrasîyê ya Rihayê bertek nîşan da, xwest tayîna wî were betalkirin û çelenga reş danîn pêşîya avahîya midûrîyetê.

Li Karamanê di Weqfa Ensarê de 45 zarokên kur ên temenê wan di navbera 8 û 10 salî de bûn, hatibûn îstîsmarkirin. Di doza Weqfa Ensarê de derheqê Asim Sûltanoglû yê ku wê heyamê Midûrê Perwerdeya Neteweyî ya Karamanê bû, bertek û nerazîbûnên li dijî tayînkirina Sûltanoglû ya ji bo Rihaye didomin.

Platforma Ked û Demokrasîyê ya Rihayê, ji bo protestokirina tayînkirina Sûltanoglû li pêşîya avahîya Midûrîyeta Perwerdeya Neteweyî ya Rihayê ya li Taxa Ertûgrûlgazî ya navçeya Halîlîyeyê daxuyanî da.

Berdevkê Demê yê Platforma Ked û Demokrasîyê ya Rihayê Kemal Yuksekkaya di daxuyanîyê de axivî û dîyar kir ku ji bo normalîzekirina jinan, tacîz û îstîsmara zarokan hewl tê dayîn.

Yuksekkaya, di axavtina xwe de wiha got, “Bi kîjan sedemê tayînê Rihayê hate kirin? Em vê tayînê rast nabînin û weke platformê dixwazin ku ev tayîn tavilê were betalkirin.”

Endamên platformê piştê daxuyanîyan çelengên reş danîn ber Midûrîyeta Perwerdehîya Neteweyî ya Rihayê.